Вчера, 28. авґуста, у Етноґрафским музею у Беоґрадзе отримана остатня програма у рамикох Манифестациї „Днї рускей култури”.
Тема вчерайшого представяня Руснацох була „Наука и Руснаци – вчера, нєшка, ютре”. Преподаванє о „Руснацох у южней Угорскей/Югославиї” отримал др Янко Рамач”, професор на Оддзелєню за руски язик и литературу на новосадским Филозофским факултету. Вон винєсол факти о Руснацох хтори призначела история – од Х вику кед ше у историйних артефактох першираз спомина мено Руснак – Рутен, та по нєшка.
На Манифестациї „Днї рускей култури”, през два тижнї кельо тирвала, Руснаци зоз виставу, представяньом обичайох, народного облєчива, литературней и културней творчосци, приблїжели нащивительом Етноґрафского музею у Беоґрадзе свой богати скарб.
