У Етноґрафским музею у Беоґрадзе вчера, 15. авґуста, почали Днї рускей култури. У сотруднїцтве з Етноґрафским музейом, алє и з велїма другима институциями и поєдинцами, манифестацию хтора отримана, и тоти цо маю буц, орґанизовал Завод за културу войводянских Руснацох.
Днї рускей култури отворени з виставу „Обряди преходох у фокусу обєктиву фотоґрафох Будинскових”, а почали з гимну войводянских Руснацох хтору одшпивал Хор „Гармония” з Нового Саду, под дириґентску палїчку Весни Кесич Крсманович.
Директорка Етноґрафского музею Миряна Менкович наглашела же Днї настали з идеї же би ше национални меншини представели на найлєпши способ, на гевтот хтори дополнює тото цо людзе уж знаю, або нє знаю о Руснацох.
Окремна подзековносц, як гварела Менковичива, припада коавторки спомнутей вистави др Миряни Дєкич, етнолоґови, спред Покраїнского заводу за защиту памятнїкох култури, Деянови Радовановичови совитнїкови, конзерваторови у Музею Войводини хтори ше остарал за дизайнерску часц вистави, и Любици Отич, музейскей совитнїци у Музею Войводини.
Директорка музею привитала предсидателя Националного совиту Руснацох Славка Раца, його подпредсидательох, в. д. директорку Завода за културу войводянских Руснацох – Ивану Дудаш, а спомла и тих цо заслужни за двотижньову програму у престолнїци, а хтори вчера, на отвераню, нє могли присуствовац.
У мено Покраїнскей влади и єй предсидателя Иґора Мировича, присутних привитал и подпредсидатель Покраїнскей влади и покраїнски секретар за привреду и туризем, Иван Дьокович:
– Препознаваме намаганя вашей рускей заєднїци же бисце представели тото цо ґенерациї пред вами стваряли, же преправяце драгу вашим нашлїднїком же би вони далєй на тей драги будовали и створене зачували – гварел Дьокович.
На отвераню шицких привитал и мр Серґей Тамаш, донєдавни директор Заводу, бешедуюци о тим же Днї рускей култури на своєродни способ коруна того цо опрез себе Завод поставел як задачу, а єдна з нїх и сотруднїцтво з фаховима институциями же би ше Руснаци представяли там дзе им и место, як цо то Етноґрафски музей.
Толкуюци як настала вистава „Обряди преходох у фокусу обєктиву фотоґрафох Будинскових”, Миряна Дєкич и урядово отворела манифестацию.
Вчера вистава, алє и руски шпиванки були у фокусу, а уж на штварток заинтересовани у Беоґрадзе годни дознац о литератури на руским язику.
Манифестация Днї рускей култури будзе тирвац до 28. авґуста.
Ту можеце превжац програму:
