Завод за културу войводянских Мадярох орґанизовал заєднїцку путуюцу виставу народного облєчива, хторей од 26. фебруара домашнї Завод за културу войводянских Горватох.
Виставу, на хторей приказани традицийни шмати мадярскей, рускей, румунскей горватскей и словацкей националней меншини, отворела директорка горватского Заводу Катарина Челикович. Присутни були и директорка Заводу за културу войводянских Мадярох Дєндї Корманьош Катона, директор руского Заводу Саша Сабадош, директорка словацкого Заводу за културу Ана Спевак и директор румунского Заводу Тодор Урсу.
Завод за културу войводянских Руснацох представел руске народне облєчиво хторе обезпечене през сотруднїцтво зоз Активом женох КУД „Жатва” зоз Коцура, чийо членїци Мария Дудаш Фейса и Коцана Колєсар порихтали шветочни женски шмати.
Вистава народного облєчива отворена у новембру прешлого року у Сенти и часц є програми прейґгранїчного проєкта „Гранїца хтора нас злучує / Border that unites us”, хтори вєдно реализую Завод за културу войводянских Мадярох, Музей „Тир Иштван” зоз Баї и Учительски факултет на мадярским наставним язику зоз Суботици, а партнере Заводи за културу войводянских Руснацох, Горватох, Румунох и Словацох. Програму ше реализує у рамикох ИПА Интереґ.
