Вчера у просторийох КУД „Тарас Шевченко” у Дюрдьове отримани „Музично фолклорни вечар”, на хторим представене троязичне капиталне дїло „Народне облєчиво бачванско-сримских Руснацох и танци бачванско-сримских Руснацох” у виданю Заводу за културу войводянских Руснацох.
О кнїжки бешедовали директор Заводу за културу ВР Серґей Тамаш, хореоґраф Микола Ґубаш и редакторка кнїжки Любица Отич, котри и участвовали у єй твореню.
Маґдалена Надь з Дюрдьова на бини указовала часци женского облєчива, цо презентоване и зоз самим облєканьом єй дзивки до шветочней пасовей сукнї, од споднєй по верхню, а представене и дакедишнє чесанє власох. Маґдалена Надь була консултант у твореню спомнутей кнїжки.
По першираз на промоциї у Дюрдьове на бини зме мали наживо представне народне облєчиво – роботни шмати дзивкох и женох, шветочни шмати за танєц и шветочни нагоди, файти материялу, як и з чим намесцали власи, цо у нїх ношели и з яких нагодох.
До народного облєчива, як є кодификоване, були пооблєкани, обути и зачесани члени секцийох КУД „Тарас Шевченко”, а виведзени и дзепоєдни музични точки.
Вчерайша промоция була и пририхтованє членох КУД „Тарас Шевченко” за наступ у Беоґрадзе, у авґусту, дзе буду учествовац у представяню култури и историї Рунацох у Етноґрафским музею.
