Вчера у Заводзе за културу войводянских Руснацох отримана 100-рочнїца од друкованя першого числа перших новинох на рускей бешеди при бачваньско-сримских Руснацох „Руски новини” хтори обявени у децембру 1924. року.
На подїї хтору орґанизовала Новинарска асоцияция Руснацох – НАР, участвовали директор Заводу за културу войводянских Руснацох Саша Сабадош, директор НВУ „Руске слово” др Борис Варґа, длугорочни новинаре и редакторе програмох по руски Радио-телевизиї Войводини Мария Тот и Мирко Канюх, а модераторка програми була новинарка Александра Бучко.
Рочнїца „Руских новинох” була повод же би представителє рускей медийней заєднїци предискутовали о поукох хтори мож вицагнуц з предходних 100 рокох континуалного информованя по руски, як и можлївих перспективох дальшого розвою руских медийох. Окреме бешедоване о виволаньох, неґативних демоґрафских трендох, проблему финансованя и других проблемох вязаних за информованє по руски.
