Вчера, 31. януара у просторийох Завода за културу войводянских Руснацох , отримане Стретнуце з Дюром Латяком.
Дюра Латяк наш визначни визначни новинар, публициста, писатель, музичар и дружтвено-политични роботнїк хтори вєшенї наполнєл 90 роки, алє и нєшка дисциплиновано роби кажди дзень – чита, виглєдує, пише, гоч припознава же кус зменшал темпо бо муши примерковац на здравє. З тей нагоди, у фокусу Стретнуцох хтори у нєформалней атмосфери модеровал директор Заводу Саша Сабадош, бешедовал о найзначнєйших хвилькох, подїйох и особох хтори означели його творчи живот, як и о планох хтори пред нїм у наиходзацим периодзе.
Кед слово о чечуцих подняцох, фокусовани є на виглєдованю градзи и материялох о Костельникови и контексту у хторим написал Граматику бачваньско-сримскей бешеди и кодификовал наш литературни язик. Ма пририхтани рукопис интересантней студиї о руских шпиванкох на пожичени мелодиї хтори скорей покус нєсправедлїво були видрилєни з нашого фолклору. Ґу тому, за друкованє пририхтана його моноґрафия з нагоди 50-рочнїци руского Театру, а тиж планує закончиц давно розпочати роман „Тополя”, як и зредзиц писнї хтори писал ище як леґинь.
