Централна преслава Националного швета Руснацох у Републики Сербиї того року отримана 21. януара у Дюрдьове.
Преслава почала зоз Вечурню у дюрдьовскей Церкви Рождества Пресвятей Богородици. Потим у будинку Рускей школи отворена вистава „Так Руснаци дараз жили у Дюрдьове”. У медзичаше, нащивителє могли коштовац традицийни руски єдла зоз етно стола у парохийней сали.
Шветочна академия отримана у Велькей сали Задружного дома. На шветочносци були вельочислени представителє и чолни особи руских институцийох, орґанизацийох и здруженьох, як и представителє дружтвено-политичного живота зоз републичного, покраїнского и локалного уровня власци, дипломатскей заєднїци и Церкви. На Академиї наступели Церковни хор „Розанов”, Дзивоцка шпивацка ґрупа Културно-уметнїцкого дружтва „Тарас Шевченко”, як и реномовани солисти з Дюрдьова – Марко Радишич, Вера Салонски и Мирела Тимко. Стихи дюрдьовского писателя Владимира Кочиша пречитал наградзовани млади рецитатор Иван Молнар. Национални оркестер под руководством Мирослава Папа мал свой окремни музични сеґмент у програми, а тиж и провадзел учашнїкох Академиї, як и домашнї Оркестер КУД „Тарас Шевченко”.
Мож повесц же музична програма була конципована традицийно, а акцент єй бул визначиц приступ ґу чуваню и интерпретованю рускей култури яка ше пестує у Дюрдьове, насампредз у домашнїм КУД „Тарас Шевченко”.
После Академиї у просторийох Културно-уметнїцкого дружтва „Тарас Шевченко” були коктел и друженє з музику за учашнїкох и нащивительох Централней преслави Националного швета Руснацох.
