На пияток, 6. октобра 2023. року на 18 годзин, у просторийох Заводу за културу войводянских Руснацох (Матици Сербскей 15) отрима ше Стретнуце з Любомиром Медєшом, як перше з планованей сериї стретнуцох зоз визначнима дїячами и творителями з рускей заєднїци.
Любомир Медєши (Руски Керестур, 1949) етнолоґ по фаху, дакедишнї кустос Войводянского музея, директор НВП „Руске слово“, предсидатель Дружтва за руски язик и литературу, предсидатель Рускей матки и активни дружтвено-политични дїяч, наукови виглєдовач, писатель и публициста. Остатнї трицец роки жиє у Канади, так же окрем о рускей традициї, власних искуствох у руским културним живоце, Любомир Медєши годзен нашей явносци одкриц и на яки ше способ розвивала руска дияспора у Сиверней Америки. Автор є трох кнїжкох: Лїсце яворово (1991), Руска традиция (2007) и Часокрок (2014), як и числених статьох и написох у новинох и часописох на руским и других язикох. Автор є, зоз сотруднїками, и Музейскей збирки Руски Керестур (1976).
Нащивителє у можлївосци поставиц питаня и на тот способ допринєсц динамики самого Стретнуца.
Розгварку будзе водзиц Саша Сабадош, директор ЗКВР.
