Пияток, 22. септембра, у просторийох Завода за културу войводянских Руснацох, отримана промоция кнїжки Радована Сремца „Руски фамелиї у валалох Општини Шид”.
На промоциї бешедовали: етнолоґ у Музею Войводини др Татяна Буґарски, прекладателька виданя мр Гелена Медєши, историчар и директор ЗКВР мср Саша Сабадош и автор кнїжки мср Радован Сремац. Сремац визначел же без огляду же основа кнїжки статистика, податки як цо мена и презвиска заш лєм можу заинтересовац за людски проповедки. Лєпше знанє о своїх предкох и нєшкайшей ґенерациї помогнє же би чували и почитовали свой идентитет, односно лєпше упознали себе самих, хто су и яке нашлїдство скарбую.
У моноґрафиї „Руски фамелиї у валалох Општини Шид” обробени и систематизовани комплетни грекокатолїцки матрикули за валали у општини Шид, и то: Адашевци, Бачинци, Батровци, Беркасово, Бикич Дол (Привина Глава), Бинґула, Вашица, Вишнїчево, Ґибарец, Ердевик, Илинци, Ямена, Куковци, Люба, Моловин, Морович и Сот. Слово о Матичних кнїжкох грекокатолїцкей парохиї у Шидзе (од 1803. року), у Бачинцох (од 1850. року) и у Беркасове (од 1919. року). У матичних кнїжкох ше у периоду од 1803. по 1925. рок находза вєдно 4099 уписани народзеня, 2716 смертельни случаї и 720 винчаня. Вєдно, у кнїжкох обробени коло 15.000 особи зоз 543 руских фамелийох.
