У Заводзе за културу войводянских Руснацох у Новим Садзе, пред красним числом нащивительох, вчера отворена ретроспективна вистава нашого познатого подобового уметнїка Силвестера Макая з Коцура, з нагоди його 75 рокох живота и 55 рокох творчей роботи.
Присутних привитал директор Заводу мр Серґей Тамаш, а о Макайовей вецейдеценийней творчосци у уметносци, як и педаґоґийней роботи, бешедовал академски скулптор Слободан Бодулич.
Як гварел Бодулич, маляр и скулптор Силвестер дїйствує на рижни способи. Його власни подобови язик препознатлїви у виражованю на поверхносци платна, як и у тродимензионалних скулптурох у просторе.
– Чловек, уметнїк, котри ше шмело жада указац у шицких своїх красних прикметох и манох, ма моци и шмелосци явно ше представиц и виложиц суду критики. Порихтани є бранїю свойо естетични принципи у рижних материялох и мотивох, хтори так схопно овладал и освоєл з творчу енерґию, же би нам одкрил цо то гевто розличне, иншаке и нєповторлїве – визначел Бодулич.
Виставу отворел сам автор Силвестер Макаї, а на вистави, хтора у Заводзе тирва два тижнї, виложени його скулптури и малюнки.
