Мр Серґей Тамаш, директор Заводу за културу войводянских Руснацох и др Миряна Менкович, директор Етноґрафского музею у Беоґрадзе, подписали заєднїцки Контракт о фахово-програмским сотруднїцстве хтори ше одноши на реализацию промоциї и презентациї Руснацох и рускей националней заєднїци у Етноґрафским музею.
Предвидзене же ше вистава “Нацонални костим Руснацох у циклусу животних обичайох” отрима у Фордовей сали у Етноґрафским музею у Беоґрадзе од 14-30. авґуст 2016. року. Вистава будзе мац коло 35 панои, на котрих буду приказани фотоґрафиї зоз колекциї Греко-католїцкого уряду зоз Руского Керестура и вельке число експонатох (текстилних предметох) и провадзацей опреми.
У програмскей часци заплановане же би ше през пейц днї отримали пейц розлични тематски презентациї Руснацох и рускей култури. Отверанє вистави заплановане 14. авґуста на 13 годзин. Други тематски вечар 17. або 18. авґуст будзе пошвецени науки и науковим досягу. Треци вечар 23. авґуста будзе пошвецени литератури, а штварти вечар 26. авґуста промоциї моноґрафиї „Народне облєчиво бачванско сримских Руснацох“, дзє ше наживо прикаже облєканє и чесанє и Етно стол. Остатнї пияти вечар 29. авґуста заплановани за промоцию танцох и фолклору, святочни закончуюци концерт и заверанє вистави.
Спорозуменє облапело и будуце медзисобне културне струднїцство помедзи Заводом за културу войводянских Руснацох и Етноґрафским музейом, цо подрозумює заєднїцке приявйованє на конкурси державних институцийох култури и науки, черанки информацийох и заєднїцке участвованє у реализациї проєктох зоз интернационалним значеньом – кажда у своєй обласци.
