Вчера, 15. децембра, на Филозофским факултету, отримана промоция Анґлийско-руского словнїка проф. др Михайла Фейси, мср Марини Шлемендер и мср Славици Чельовски.
На промоциї бешедовали авторе, проф. др Михайло Фейса и мср Марина Шлемендер, спред видавательох директор Заводу за културу войводянских Руснацох Саша Сабадош, а спред Городу Нового Саду хтори финансовал публикацию, помоцнїк городоначалнїка Александар Петрович.
Гоч исную даскельо хасновити двоязични публикациї, мож повесц же „Анґлийско-руски словнїк” затераз найобсяжнєйше и найкомплетнєйше лексикоґрафске дїло. Ґу тому, обрабя и терминолоґию з облаци рахункарства, еколоґиї, родней ровноправносци и других актуалних обласцох.
У кнїжки обробени коло 50 тисячи слова, а наменєни є широкому хаснованю – насампредз у настави и прекладательстве. Понеже ше тота публикация нє предава, а тираж огранїчени, дистрибуовац ше виключно будзе на наступних промоцийох. Шлїдуюца будзе у Руским Керестуре 28. децембра, а потим у Коцуре 13. януара 2023. року.
