Стреду, 06. априла, у кино-сали Филозофского факултету у Новим Садзе отримана промоция осучаснєного Правопису руского язика зоз правописним словнїком, авторох мр Гелени Медєши и проф. др Михайла Фейси.
Присутних привитали директорка Заводу Анамария Ранкович, хтора здогадла же друкованю Правописа претходзели пейц явни розправи, хтори пре огранїченя у условийох пандемиї корона вирусу преношени на живо прейґ дружтвених мрежох цо оможлївело вельо вексше уключованє явносци до розришованя язичних дилемох, як и помоцнїк городоначалнїка Нового Саду Александар Петрович, хтори медзи иншим гварел же ше наздава же два представени кнїжки пошвидко прикраша и збогаца кажде руске обисце.
Представяюци Правопис, його авторе мр Гелена Медєши и проф. др Михайло Фейса потолковали цо му главни циль, а то розришиц нагромадзени дилеми и нєдоповедзеносци хтори ше у нашим язику нагромадзели за остатнї 50 роки, од обявйованя референтного Правопису Миколи М. Кочиша.
Друкованє Правопису потримала Городска управа за културу Городу Нового Саду. После промоциї Правопису отримана и промоция виданя Рускей матки “Мала история Русинох”.
По законченю промоциї, шицки нащивителє достали по безплатни прикладнїк обидвох публикацийох, а подобни промоциї буду отримани и у других наших местох.
