На конкурс за одкуп уметнїцких дїлох Министерства култури и информованя Републики Сербиї у прешлим року конкуровал и Завод за културу войводянских Руснацох (ВР), за одкуп малюнку уметнїка Владу Нярадия з Вербасу. Завод конкуровал за одкуп малюнку „Ruthenian”.
Спомнута подобова робота з циклусу „Карпатски мит”, на хторей Няради на ориґинални, а препознатлїви способ укомпоновал етноґрафски елементи орнаментики вязани за Руснацох, як и часц гербу рускей националней меншини.
Министерство култури и информованя други рок на тот способ финансує подобово роботи, а институциї хтори конкурую поставаю власнїки роботох, так же Завод за културу ВР будзе збогацени з Нярадийову подобову роботу.
Министерство финансує одкуп подобових роботох найзначнєйших уметнїкох зоз Сербиї, як цо то Владимир Величкович, Душан Оташевич, Чедомир Васич, Милета Проданович, Коста Боґданович, а тераз медзи нїма и Владо Няради.
