У Заводзе за културу войводянских Руснацох вчера отримана Музично-литературна програма младих, як и вистава фотоґрафийох Даряна Гардия, у орґанизациї младежского часопису МАК и Заводу за културу войводянских Руснацох.
На програми участвовали млади авторе – музичаре, шпиваче и поетове котрим того и прешлого року вишла кнїжка, лєбо музични албум як додаток часопису МАК.
Програму провадзела вистава фотоґрафийох зоз зборнїку фотоґрафийох „// / /”, Даряна Гардия, хтори вишол з остатнїм числом МАК-у, у сотруднїцтве зоз Заводом.
Програму отворела редакторка МАК-у Мая Зазуляк, привитала нащивительох и представела тогорочну роботу младежского часопису НВУ „Руске слово”, а представела и спомнути зборнїк фотоґрафийох Даряна Гардия.
По єдну шпиванку одшпивали шпивачки котри сотрудзовали на твореню албуму Златка Русковския „Лєм єден погляд”, хтори вишол з октоберским числом МАК-у – Анамария Колошняї и Саня Полдруги, а инструментално их провадзели Сашо Палєнкаш и сам автор Златко Русковски.
З поезию ше представели Цецилия Надь и Михаил Рамач, котрим вяри того року видата двокнїжка „Чаривни нїтки/З молу до дуру”. Надьова пречитала три писнї, а Рамач єдну, док другу, хтору сам и викомпоновал, одшпивал и одграл на ґитари.
Саня Полдруги одшпивала єдну авторску шпиванку з єй албуму „Поведз ми”, хтори вишол вяри прешлого року, а на ґитари ю провадзел Михаил Рамач.
З наймладших сотруднїкох МАК-у ше представели и Марина Роман и Кристина Афич з єдну шпиванку на анґлийским язику. Потим виведзени ище три композициї з албуму „Лєм єден погляд” Златка Русковския, а пущени и видео-спот, хтори знїмани початком юния за писню „Пламень” зоз спомнутого албуму.
Директор Заводу за културу войводянских Руснацох Серґей Тамаш похвалєл роботу часопису МАК и гварел же ше сотруднїцтво Заводу и МАК-у предлужи и у 2016. року. Мая Зазуляк подзековала учашнїком и нащивительом же потримали програму и наявела же од нового року МАК будзе виходзиц кажди мешац.
