З нагоди ювилею Радио-телевизиї Войводини (РТВ) – 40 рокох од снованя, отримана прес-конференция на хторей представени телевизийска и радийска програма меншинских редакцийох.
Як гварел Помоцнїк директора РТВ Йожеф Клем, тот явни сервис окрем на сербским емитує програму на мадярским, словацким, румунским, руским, українским, горватским, бунєвским, ромским и македонским язику – на 10 язикох 24 годзини дньово и з тим є лидер у регионє и вироятно рекордер у Европи. Додал и же емисиї на язикох меншинох треба титловац на сербски язик, же би були доступни ширшому авдиториюму.
Редактор Другей програми РТВ Атила Мартон визначел же програма на язикох националних меншинох звекшана за 16 одсто, а у планє увесц програму на ище двох- трох язикох.
О програми Рускей редакциї РТВ бешедовал одвичательни редактор Мирко Канюх, котри визначел же таку рижнородну и богату програму, хтора облапя културни, документарни, гумористични, информативни и едукативни прилоги – Руснаци нїґдзе у швеце нє маю, а наявел и мини-сериял о др Гавриїлови Костельникови.
Радийску програму на руским язику представела одвичательна редакторка Златица Няради, котра гварела же Руска редакция Радио Нового Саду дньово емитує пейцгодзинову програму и три полгодзиново нєзависни продукциї, хтори ше витворює у сотруднїцтве з младима, а програми присуствовали Славко Рац, предсидатель Националного совиту Руснацох, Мартица Тамаш директора НВУ Руске Слово, и Серґей Тамаш, директор Заводу за културу войводяснких Руснацох.
