У Заводзе за културу войводянских Руснацох вчера, 28. октобра, отворена вистава „Шицко то оглашки и реклама” и представени двоязични Каталоґ „Хто оглашує, тот напредує”. Вистава понука препатрунок рижних рекламних оглашкох у рускей периодики од 1921. по 1941. рок, робених по клишеох одредзеней друкарнї.
Привитуюци присутних, виставу отворел директор Заводу Серґей Тамаш наглашуюци же то своєродне преглїбйованє виглєдовацкей роботи од влонї, кеди отворена подобна вистава, як и резултат сотруднїцтва Заводу з Музейом Войводини, Архивом Зомбору и Архивом Нового Саду.
Єден з авторох Каталоґу, историчар Саша Сабадош визначел же тота вистава добри крочай ґу отвераню єдного поглавя хторе мож наволац „преучованє и виглєдованє привредней и дружтвеней историї Руснацох медзи двома шветовима войнами”. На нєй видно як нашо Руснаци зарабяли, кадзи ше селєли, з єдним словом – як жили.
– Правда же то виучованє привредного живота Руснацох, алє з музеолоґийним и архивским язиком – гварела тиж авторка Каталоґу и кустос у Музею Войводини Любица Отич, а потолковала и цо то оглашка, а цо реклама.
З линґвистичного аспекту, интересантну и студиозну статю, подкрипену з фактами и илустрациями о оглашкох и рекламох, пречитала наша позната линґвистка мр Гелена Медєши. Медзи иншим, вона бешедовала о єдней компоненти рекламного дискурсу з нашей старшей периодики хтора наглашує упутеносц наших людзох єдних на других, чувство припадносци до єдней националней и язичней заєднїци, и сводомосц же свой свойому найлєпше зроби, порадзи, посовитує и да знац.
Видаватель Каталоґу Завод за културу войводянских Руснацох, а вистава и Каталоґ реализовани зоз средствами Покраїнского секретарияту за културу и явне информованє АП Войодини.
