У мисиї Републики Сербиї при Европскей униї, вчера отримани Дзень Войводини у Бриселу. З тей нагоди була отворена вистава Заобиходни стратеґиї – архитектура у Войводини на початку 21. вика.. Вистава облапела плакати Музея сучасней уметносци Войводини, публикациї Заводох за културу националних меншинох у Войводини и Заводу за културу Войводини, як и проєкцию краткого филму. На отверню вистави бешедовал др Боян Пайтич, предсидатель Покраїнскей влади, Кнут Флекенштайн, посланїик у Европским парламенту и Славиша Груїч, покраїнски секретар за културу и явне информованє.
„Циль нам бул же би зме на Отворених дньох у Бриселу представели Войводину през дїялносц наших Заводох за културу войводянских Руснацох, Мадярох, Горватох, Словакох и Румунох и Завода за културу Войводини, же би ше представела култура у Войводини, алє и шицко тото цо Сербия дава зоз свойого боку. Нашо ткв. амбасадорске порученє шицким – а то же Войводина може и треба же би була викрок Сербиї, дзе приказуєме свойо найкрасше лїцо. Национални заєднїци на териториї Войводини найлєпши представнїки у иностранству. Однос наспрам нїх тиж треба же би бул таки же ше пишиме а ми то и робиме,“ гварел покраїнски секретар за културу и явне информованє.
