У просторийох Руского КУД „Др Гавриїл Костельник” у Кули, отримана шеста схадзка Орґанизацийного одбору за Централну преславу националного швета Руснацох, хтора нарок, 16. януара будзе у Кули.
У розпатраню дотерашнїх и будуцих активносцох на пририхтованю програмох Централней шеточносци вчера поведзене же материял за моноґрафию о Руснацох у Кули скоро два трецини позберани и до конца того, лєбо початком идуцох мешаца би мал буц и комплетовани. За виробок моноґрафиї задлужени Александер Мудри.
Подобово уметнїки з Кули Лидия Барна и Амалия Ковач вчера придали и потребни материял за пририхтованє каталоґох о їх виставох хтори буду на Централней шветочносци, а члени Одбору у контакту и з о. Йосафатом Гардийом зоз Словениї, родом Кулянцом, чия вистава подобових роботох тиж будзе отримана под час означованя нашого швета у Кули, як и вистава роботох Здруженя женох „Идея” з Кули.
На вчерайшей схадзки бешедоване и о дзепоєдних технїчних детальох потребних за поставянє виставох, як и о одредзованю задлужених за пририхтованє етно-столох з рускима єдлами.
Наглашене же проби Националней оркестри, под руководительством Мирона Сивча, почню о тидзень у Новим Садзе, а тирваю и одредзени активносци за вибор и пририхтованє шпивачох на Шветочней академиї, за цо задлужена Агнета Тимко. За наступ на Шветочней академиї пририхтую ше и шпивацки ґрупи домашнього КУД, под руководительством Еуфемиї Планкош, у чим єй поможе Юлиян Рамач Чамо з керестурского Дому култури. Пририхтує ше и Камерни состав професорох Школи за основне музичне образованє, а бешедоване и о других сеґментох Шветочней академиї.
У других часцох Централней шветочносци наступя и млади рецитаторе и музичаре з Кули, у кулскей грекокатолїцкей церкви будзе отримана Благодарна Служба Божа, як и турнир у шаху, за цо тирваю пририхтованя.
Шицки присутни на вчерайшей схадзки ше усоглашели же цо скорей потребне подписац Протокол з Општину Кула о технїчней потримовки коло орґанизованя Националного швета хторе би у наяви мало буц поробене по шлїдуюцу схадзку Орґанизацийного одбору, хтора будзе 27. октобра.
