Заводу за културу войводянских Руснацох одобрени два проєкти з хторима конкуровал до Министерства култури и информованя и до Городу Нови Сад кед у питаню културна дїялносц.
Министерство култури и информованя зоз 474 399 динари потрима проєкт „Приручна библиотека Руснацох – Формованє фонду руских кнїжкох”, а Город Нови Сад зоз 200 000 динари за видаванє нового компакт-диску Националного оркестру Руснацох.
По словох директора Тамаша, очуванє нашого културного скарбу, його ширенє и представянє основни циль наменских средствох за приручну билиотеку. Заплановане же библиотека будзе полуотвореного типу, будзе умрежена з Городску библиотеку Нового Саду, з Одсеком за русинистику, другима рускима институциями и канцелариями.
Улога оформйованя самей библиотеки же би мала и интернационалне значенє, понеже плановане позберац и предочиц публикациї вязани за Руснацох/Русинох и звонка нажей жеми, у шицких обласцох. Намаганє же би у Библиотеки були заступени шицки руски авторе з Войводини, Сербиї, реґиону и з других жемох, плановане мац найменєй 2 000 наслови, алє и електронску базу одредзених документох. Снованє такого подцагу потримала и Народна библиотека з Беоґраду.
У тим напряме пияток, 11. септембра, и представителє Заводу участвовали на семинаре за библиотекарох у Войводини, у орґанизациї ЕУ Инфо Поинт Нови Сад, на хторим представени и програми на хтори библиотеки можу конкуровац за средства ЕУ.
Други одобрени проєкт потримани з боку городу НС, друга часц компакт-диску Националого оркестру Руснацох як найквалитетнєйшого сеґменту музичней творчосци кед у питаню презентация музики у рускей заєднїци. ЦД будзе обявени до конца рока, а на нїм буду и гимна Сербиї и шветочна шпиванка Руснацох у Сербиї.
У наяви можлївосц реализациї мултинационалного проєкту и предлуженя сотруднїцства медзи меншинскима Заводами як часц проєктней активносци поставки театралней представи „Свадзба” А. П. Чехова, хтору ше будзе виводзиц на вецей меншинских язикох, а проєкт начално будзє потримани з боку як меншинских Заводох так и Покраїнского секретарияту за културу и явне информованє.
