Закончена штиродньова фахово-едукативна роботня – семинар за наших хореоґрафох и танєчнїкох, хтори тримал хореоґраф Закарпатского народного хору з Ужгороду, з України, Микола Мовнар. Семинар орґанизовал Завод за културу войводянских Руснацох, отримани є у просторийох керестурского Дому култури, а хореоґрафови у роботи помагали професийна танєчнїца у Закарпатским хору Аня Кохан и корепетитор з керестурского Дому култури Юлиян Рамач Чамо.
На семинаре участвовали 12 танєчнїки и хореоґрафе з наших КУД – штверо з Дюрдьова, та по двойо з Вербасу, Коцура, Шиду и Керестура, а попри ученя крочайох и часцох танцох зоз шицких реґионох Закарпатскей обласци, Микола Моивнар з учашнїками поставел и танєц „Тропотянка”.
Учашнїки роботню оценєли як барз удатну и хасновиту, так же здобуте знанє пренєшу до тенєчних секцийох у своїх КУД.
Семинар тирвал од 9. по 12. юний, а штварток, 11. юния, Мовнар и Коханова нащивели и КУД „Тарас Шевченко” у Дюрдьове, дзе присуствовали на пробох членох пририхтуюцей и виводзцкей фолклорней ґрупи, та и їх упознали з русинскима закарпатскима танцами.
Завод за културу ВР семинар орґанизовал у сотруднїцтве з Националним совитом Руснацох, Школу „Петро Кузмяк”, у чиїм интернату учашнїки були змесцени, як и з парохийним Каритасом, дзе им було орґанизоване костиранє.
Семинар орґанизовани на основи Спорозуменя о медзиреґионалним сотруднїцтве медзи Войводину и Закарпатску обласцу України, хторе подписане у октобре 2013. року.
Концом того, лєбо початком идуцого рока, Завод за културу ВР орґанизує ище єдну подобну роботню за танєчнїкох и хореоґрафох, на хторей буду преподавац фаховци з Пряшова, зоз Словацкей, а на основи Спорозуменя о медзиреґионалним сотруднїцтве медзи АП Войводину и Пряшовским самоуправним крайом у Словацкей.
