Всоботу и вчера, 16. и 17. мая у Заводу за културу войводянских Руснацох отримана дводньова едукативна роботня писаня предкладох проєктох под назву «Управянє зоз проєктнма циклусами” 2. часц – актуални програми ЕУ ИПА прейґгранїчни сотруднїцства. Едукация отримана як порядна часц Програмских активносцох Заводу за 2015. рок. То други циклус едукативних роботньох од трох котри заплановани того року, кед у питаню Проєктне планованє и виробок проєктних предкладох хтори унапрямени цо лєпше оспособиц и порихтац Руснацох и руску заєднїцу за писанє проєктох. Едукацию водзела мастер пословней психолоґиї Ивана Копривица, сертификовани тренер за обласц Проєктного менаджменту и особа котра през длугорочне проєктне искуство ма вецей дзешатки написаних и имплементованих проєктох.
Циль едукациї звекшац уровень знаня и схопносци учашнїкох/цох за писанє проєктних предкладох, як и порушац сотруднїцство и тимску роботу медзи учашнїками/цами, як би ше у будуцим периоду заєднїцки конкуровало за средства домашнїх и медзинародних донаторох и ЕУ фондох.
През дводньову роботню, тимску роботу и сотруднїцство медзи самима присутнима учашнїками, мали зме можлївосци чуц, винєсц и презентовац креативносц присутних учашнїкох и їх идейни предклади, актуални теми як и способ їх ришованя. Шицки присутни на едукациї виражели позитивне становиско и думанє на таки едукативни и подобни роботнї, котри можу хасновити за сами орґанизациї и дружтва, и же би вшелїяк требало предлужиц зоз такима роботнями. Тото цо наисце найважнєйше то мац правилно и точно написани проєкт спрам поглєдованих критериюмох и ЕУ стандардох и буц порихтани за будуци конкурси и отворени явни поволанки за медзинародни финансийни средства зоз ЕУ фондох и рижних донацийох ( як домашнїх так и медзинародних).
