После отриманей инициялней роботней схадзки зоз чолнїками Општини Кула, локална самоуправа потрима Централну преславу означованя Националного швета Руснацох у Републики Сербиї, хтора зпланована за 16. януаре 2016. року – порадзене на розгварки директора представительох наших институцийох з чолнїками Општини Кула, отриманей у Кабинету предсидательки Скупштини општини Кула Снежани Мркаич.
На основи Одлуки Националного совиту Руснацох о розпорядку отримованя централних програмох з нагоди 17. януара, шветочносц заплановане отримац у Кули, а тото стретнуце було инициялне за снованє Орґанизацийного одбору, як и за доставанє технїчно-лоґистичней и другей оперативней потримовки од Општини за єй саме орґанизованє. О тим з предсидательку Скупштини Општини Кула Снежану Мркаич, заменїком предсидателя Општини Кула Велибором Милоїчичом, началнїком Општинскей управи Велибором Савковичом и шефом Одборнїцкей ґрупи Сербскей напредней странки у кулскей СО Перицом Видеканїчом бешедовали предсидатель Вивершного одбору Националного совиту Руснацох Желько Ковач, директор Заводу за културу войводянских Руснацох Серґей Тамаш и предсидатель Руского КУД „Др Гавриїл Костельник” у Кули Владимир Бучко.
Директор Заводу за културу ВР Серґей Тамаш домашнїх поблїжей упознал з дотерашнїма програмами Централного означованя нашого швета и позитивним сотруднїцтвом з локалнима самоуправами у єй орґанизованю, як єдней з важнєйших програмних, орґанизацийних и финансийних активносцох Заводу. Як гварел заменїк предсидателя Општини Кула Велибор Милоїчич – и кулска локална самоуправа будзе добри домашнї, з тим вецей же є приклад барз добрих медзинационалних одношеньох, же у тей општини жиє найвекше число Руснацох у нашей жеми, а Општина финансує и роботу єдиного Дому култури Руснацох, як установи, у Керестуре, тиж и КУД „Др Гавриїл Костельник” у Кули. Вшелїяк же то будзе нагода векшей афимациї Руснацох у городзе Кули, а догварене же, як и по тераз директор Заводу подпише з предсидательом Општини Кула Драґаном Трифуновичом подпише меморандум о техничним сотруднїцтве и потримовки же би ше, як поведзене, у буджету Општини могло плановац и одредзени потребни средства за тоту намену и дзе ше дефиную обовязки як и потримовка локалней самоуправи.
У будуцим Орґанизацийним одборе за Централну преславу националного швета Руснацох у Кули буду и представителє локалней самоуправи, а такой догварене же єден з нїх будзе Каменко Бертич , директор Културного центру Кула, дзе Централна академия будзе отримана. Попри сали и других просторох Културного центру, на розполаганю будзе и його Ґалерия, а после розгварки з чолнїками Општини, Ковач, Тамаш и Бучко нащивели и Културни центер, дзе о спомнутим бешедовали з директором Бертичом.
Порадзене же у маю будзе конституованє Орґанизацийного одбору з нагоди Централоного Швета.
