У Заводзе за културу войводянских Руснацох отримана явна трибина на тему „Защита руского културного скарбу – резултати и перспективи”, на хторей о актуланим стану и приоритетох у тим значним сеґменту за чуванє националного идентитету бешедовали нашо водзаци фаховци у тей обласци: др Йоаким Стрибер, фахови сотруднїк беоґрадского Централного институту за конзервацию на прикладзе керестурскей катедрали св. о. Миколая представел активносци на очуваню нєрухомих памятнїкох култури. Любица Отич, кустос-музейни совитнїк у Музею Войводини бешедовала о защити етноґрафского скарбу, док др Янко Рамач, порядни професор на Филозофским факултету у Новим Садзе, акцентовал важносц друкованих памятнїкох култури, насампредз старих кнїжкох и рукописох на наших парихийних библиотекох.
На трибини бешедовала и др Миряна Джекич, етнолоґ-конзерватор у Покраїнским заводзе за защиту памятнїкох култури, котра представела дотерашнї и будуци активносци на очуваню руских катеґоризованих памятнїкох култури, як цо то нашо церкви у Керестуре и Новим Садзе, Водица, Руски двор у Шидзе, Руска школа у Дюрдьове и найстарша хижа у Керестуре.
Архивиста у Историйним архиву Зомбор Саша Сабадош нащивительо трибини упознал зоз законодавним рамиком у обласци очуваня културного скарбу и актуалнима трендами у тей сфери, а окреме наглашел важносц матичних кнїжкох, як шведкох о континуитету и демоґрафских рушаньох при Руснацох на тих просторох.
Предсидатель Вивершного одбору Националного совиту Руснацох Желько Ковач на трибини здогаднул же защита културного скарбу Руснацох прейґ националней библиотеки, архиву, музею и ґалериї важни сеґмент Националней стратеґиї, алє за успих у доходзеню до нїх необходне же би, попри фаховцох, у тим участвовала цала руска заєднїца.
Спатрени стан у шицких спомнутих обласцох указує же ситуация алармантна, гоч єст и винїмки. Нєрухоми памятнїки култури запущени, очкодовани, лєбо и девастовани, експонати у музейних збиркох ше нє чува адекватно, та велї препадаю, лєбо су и затрацени, а як проблем винєшене и же лєм часточно знаме цо єст „на терену”, та з тим и цо перше треба зачувац.
За винїмки у тей обласци заслужни ентузиясти – орґанизациї и поєдинци, як цо то Етно-клуб „Одняте од забуца” у Коцуре, лєбо „Руска одлога” у Дюрдьове и приватни збирки, а за правилни и системски приступ ґу тей обласци потребне вецей – фахови кадер, адекватна инфраструктура и обсяжна стабилна материялна потримовка.
На сходзе поведзени велї хасновити информациї, а як наглашел директор Заводу за културу ВР Серґей Тамаш, то лєм перша з вецей трибинох хтори Завод планує орґанизовац. На нїх буду винєшени и искуства других националних заєднїцох хтори нам можу буц лєм хасновити.
Шицки присутни потримали предклад да ше на єшень отрима фахова роботня о способу и фахових технїкох виробки иконох на склу, хтора будзе предлуженє нєшкайшей трибини…
Прилапени шлїдуюци заєднїцки заключеня: здрави фундаменти през дефинованє приоритетох як и партнерох /тим людзох хто будзе системски робиц на тим проєкту, ревитализовац и вихасновац потенцияли през идентификацию материялох – дзе их фахово похранїц / , вшелїяк же потребна нова катеґоризация през запровадзанє сучасних трендох, технїкох и средствох зоз цильом очуваня руского културного скарбу та змоцньованє руского идентитету при войводянских Руснацох.
