У Городскей читальнї у Суботици отримана традицийна Културна манифестация „Яр Мафея Виная”, у орґанизациї Дружтва Руснацох у Суботици. Пред вечаршу програму, квеце на гроб Мафтея Виная на теметове у Суботици пияток дополадня спред Дружтва положели Иван Гарди, Ксения Палатинус и дзивка покойного Мафтея Виная Татяна Таґасович.
Тогорочна Културна манифестация була пошвецена младим Руснацом и почала з виставу фотографийох Марияни Павлович з Руского Керестура, з єй кнїжки фотографийох „Проблеми”, а авторку представела одвичательна редакторка нашого часопису за младих МАК Мая Зазуляк.
У предлуженю програми присутних, медзи котрима були и предсидатель Вивершного одбору Нациналного совиту Руснацох Желько Ковач и директор Заводу за културу войводянских Руснацох Серґей Тамаш, привитал предсидатель Дружтва Руснацох у Суботици Иван Гарди, док з пригодним текстом, подпредсидатель Дружтва Иван Емейди присутних здогаднул на живот и дїло Мафтея Виная, наглашуюци же бул єден з наших преднякох котри вдерели фундаменти рускей култури на тих просторох.
На тогорочней „Яри Мафтея Виная” у Суботици отримана перша промоция найактуалнєйшого додатку МАК-у – двокнїжки поезиї „Чаривна нїтка” Цецилиї Надь з Руского Керестура и „Од молу до дуру” Михаил Рамач з Дюрдьова, котри и сами гуторели свойо стихи, а Михаил даскельо и одшпивал, провадзаци ше на ґитари.
У музичней часци програми участвовали Анамария Колошняї, котру на ґитари провадзел Златко Русковски з Руского Керестура и Марина Роман и Александра Русковски, тиж з Керестура, котри одшпивали два композициї, провадзаци ше на ґитарох.
На концу програми директор Заводу за културу войводянских Руснацох Серґей Тамаш Дружтву подаровал найновши виданя Заводу, а мож повесц же млади учашнїки, вєдно з редакторку МАК-у Маю Зазуляк, котра обдумала концепцию програми, були праве ошвиженє нашей Манифестациї у Суботици.
По законченей програми, у просторийох Дружтва Руснацох у Суботици орґанизоване друженє за шицких учашнїкох и госцох.
