А/В ПРОДУКЦИЯ

Провадзаци розвой сучасних технолоґийох и пременку справованя публики у складзе з тим, Завод за културу войводянских Руснацох часци своїх програмох и проєктох реализує и у форми авдио и видео материялох.

За каждим авдио або видео продуктом, котри зме витворели, стоя велї часци мозаїка котри потребни же би ше створела слика рижнородносци култури войводянских Руснацох. Велї материяли реализовани як копродукция зоз значну помоцу партнерох.

ВИДЕО

Даєдни видео материяли, як цо то, на приклад емисия о Йованови Храниловичови Завод софинансовал виробок, а интерактивни приповедки за дзеци реализовани як часц конкурсу Заводу за очуванє нєматериялного скарбу.

10 роки Заводу

З нагоди означованя 10. рочнїци роботи и иснованя Заводу за културу войводянских Руснацох пририхтана крадка емисия о його потерашнїх векших проєктох. О сотруднїцтве зоз Заводом бешедовали фаховци, вонкашнї сотруднїки Заводу, з чию помоцу Завод реализовал велї значни проєкти, котри важни за очуванє културного идентитета рускей заєднїци.

Интерактивни видео приповедки за дзеци

Проєкт котри реализовани у сотруднїцтве з Новинарску асоцияцию Руснацох, з цильом очуваня руского язика и його популаризациї при наймладших. З оглядом на хронїчни нєдостаток сучасних авдио/видео змистох за дзеци на руским язику, то єден з перших проєктох такей файти, котри поруша розвой ище вецей таких змистох.

Емисия о Йованови Храниловичови

Завод за културу войводянских Руснацох технїчно потримал виробок документарней емисиї о Йованови Храниловичови, священїкови котри 25 роки бул парох новосадскей грекокатолїцкей парохиї и чловекови котри уведол Руснацох до явного и дружтвеного живота Нового Саду и Войводини.

Емисию пририхтала и реализовала Новинарска асоцияция Руснацох.

АВДИО

Даєдни авдио материяли, як цо то шпиванки женскей ґрупи РКПД “Нє шицко то правда” поробени у копродукциї, у тим случаю зоз часописом за младих “Мак” лєбо композициї хтори виведол Национални оркестер Руснацох хтори зняти у сотруднїцтве зоза ЯМУ РТВ и Студиом „М“ у чиїм је власнїцтве ЦД.