виривок зоз тексту за моноґрафию “Червене пупче”
Дюра Латяк
Ювилейни Фестивал рускей култури „Червена ружа“ представя красну нагоду и за сумированє резултатох на планє музичней творчосци наменєней дзецом школского возросту, презентованих на фестивалскей манифестациї „Червене пупче“.
Шведкове зме же ше велї шпиванки, записани на ношачох звука, часто емитую прейґ електронских медийох як состойна часц їх фонотеки, алє їх обявйованє у окремней публикациї, по нашим прешвеченю, представя найприкладнєйшу форму презентованя будуцим творчим ґенерацийом. Цо вецей, то у найвецей случайох будзе и єдина сатисфакция музичним творительом, бо треба знац же нє шицки композициї зняти на ношачи звука. Нє каждого року додзельовани анї награди автором найудатнєйших витвореньох.
Треба ту спомнуц же „Пупче“ полни седем роки „младше“ од „Червеней ружи“.
Теди кед „Червена ружа“ прежила свойо „дзецински хороти“ и преросла до Фестивала култури зоз вецей манифестациями (1968. року), на инсистованє просвитних роботнїкох з наших местох и окремне закладанє учителя Якима Олеяра, од 1969. року єдна з нових манифестацийох постало и „Червене пупче“. Бул то час кед ше шицки орґанизацийни роботи окончовало волонтерски, на добродзечней основи.
Спочатку концепция тей манифестациї була ревиялного характера, як смотра
рочних резултатох руских школярох основних школох у обласци музичносценского вихованя, окреме писнї и танцу. Медзитим, пошвидко вона постала така масовна же нє могла прияц шицких цо на нєй жадали участвовац. Прето ше по одредзених пунктох почало орґанизовац квалификацийни смотри – „Мали пупча“, зоз котрих шє лєм найлєпши пласовали на главну манифестацию „Червене пупче“ до Руского Керестура.
Хронолоґийне презетнованє музичних творох за дзеци школского и предшколского возросту ма и одредзену наукову димензию, бо оможлївює науковцом же би здобули одвитуюци заключеня о динамики у розвою нашей музичней култури кед слово о творчосци за младих, а то источасно и основа за дальшу музичну творчосц у рамикох нашей националней заєднїци.
Намагали зме ше зазначиц и шицки наградзени композициї и тексти виведзених писньох на Червеним пупчу од 1969. по 2010. рок.
