У сотруднїцтве Заводу за културу войводянских Руснацох и НВУ „Руске слово” публикована нова кнїжка Мирона Жироша Бачванско-сримски Руснаци дома и у швеце, 1745-2002 III/1 том. На основи контракту о дарунку медзи Заводом и нашлїднїками Мирона Жироша, дзекуюци иножемним донатором и пошвеценей роботи наших фаховцох и редакторох у октобру публикована часц материялох хтори у електронскей форми достал Завод.
Промоция тей кнїжки, пре епидемиолоґийну ситуацию, отримана онлайн на фейсбук боку Заводу. На промоциї участвовали проф. др Янко Рамач, проф. др Дюра Гарди, мср. Саша Сабадош, рецензент Дюра Латяк и редактор виданя Микола Шанта. Заинтересовани, хтори провадзели онлайн промоцию Жирошовей кнїжки, могли учашнїком прейґ Фейсбуку поставяц питаня, а знїмок промоциї доступни на Ют’юб каналу Заводу за културу войводянских Руснацох. Кнїжку мож купиц прейґ НВУ „Руске слово”.
