Мисия

Завод за културу войводянских Руснацох професионална нєпрофитна установа котра снована з боку Скупштини АП Войводини и Националного совиту Рускей националней меншини чий циль помоц у посцигованю и афирмациї позарядовосци на найширшим подручу култури войводянских Руснацох.
Циль посцигуєме з културнима дїялносцами виглєдованя, мапираня, евалуациї, валоризациї, меморованя, архивованя, систематизованя, продукциї, унапредзованя, едукациї, совитованя и постредованя у култури.
Прето сотрудзуєме з меншинскима, векшинскима и иножемнима фаховима особами, орґанизациями, институциями и то на таки способ же би зме профиловали и змоцнєли руски кадри, институциї, ресурси и реципиєнтох култури.

Визия

Наша визия то руска култура препознатлїва у найширших кругох по своєй позарядовосци у чиєй вибудови участвую шицки пасма, од културних елитох по реципиєнтох.

Сотруднїцтво

Поняце позарядовосци, як го ми попхопюєме, найлєгчейше мож потолковац зоз словами Вудра Вилсона же чловек приходзи ґу себе теди кед пренаходзи гевто цо найлєпше у нїм и кед задоволї свойо шерцо зоз найвекшима досцигнуцами за котри є створени. Завод жада олєгчац Руснацом «приходзенє ґу себе» и прето жада сотруднїцтво з гевтима котри уж на розличних културних подручох пренашли и дали гевто цо найлєпше у нїх, и гевтима чий час лєм приходзи.
Предпоставка же руска култура уж ма позарядових людзох и досцигнуца. Циль Завода же би препознал тоту позарядовосц, же би ю кодирал, зачувал и презентовал ширшей публики. Прето ше Завод будзе закладац за найширши форми сотруднїцтва з окруженьом котре дзечне упознац, потримац, розвиц и прилапиц тоту позарядовосц.

Активносци

Посцигованє позарядовосци жадаме досцигнуц през виглєдованя и консултациї, постредуюци медзи автором и публику, змоцнююци и усовершуюци през едукативни активносци роботу автора, и помагаюци евалуацуийни и валоризаторски пракси критики. През едукативни активносци жадаме подзвигнуц културни уровень и повязац руску културну систему зоз ширшима локалнима, реґионалнима, покраїнскима, националнима и европскима културнима системами. Завод ше прето занїма з видаваньом кнїжкох, брошурох, музичних кнїжкох и публикацийох, часописох, каталоґох, периодики и звучних записох. З орґанизованьом и систематизацию културного нашлїдства Руснацох креируєме основу за презентованє културних подручох Руснацох у руских штредкох и ширше.

Финансованє

Завод финансує свою порядну дїялносц зоз средствох Покраїни, алє ше за плановани активносци средства гледа при донаторох, з домашнїх и медзинародних фондох.

Институционални профил

Завод порушал документацийно-информацийну, розвойно-виглєдовацку и програму сотруднїцтва з медзинароднима и домашнїма институциями котри годни функционовац продуктивно у рускей културней системи. Завод нє институция котра иснує сама за себе, алє институция димензионована спрам потребох актерох у рускей културней системи. Програми Завода зме похопели на активни способ, дзе нам приоритет тот же би ше препознати вредносци вихасновало за реализацию гевтого найлєпшого у нас, и за презентацию гевтого цо зме уж посцигли.