На правей половки герба находзи ше медведз червеней фарби, у стояцим положеню, хтори патри на лїви, гералдични бок. Спрам толкованя, медведз стародавни славянски символ хтори Руснацох вяже за їх праотечество у Карпатох. Друга половка герба подзелєна на седем горизонтални поля, на хторих ше зменюю пантлїки цмей белавей и златно-жовтей фарби.

Описани герб преноши историйну традицию Руснацох. Вон 30. марца 1920. року постал урядови герб автономней обласци Подкарпатскей Руси зоз шедзиском у Ужгородзе у составе Чехословацкей од 1919. по 1938. рок. На тим гербу пантлїки белавей фарби означую штири жупаниї: Унґ, Береґ, Уґоча и Мараморош, хтори вошли до составу спомнутей обласци, а три златно-жовти пантлїки — три златоносни рики з тей обласци: Уж, Латорица и Тиса. Комбинованє белавей и жовтей фарби вшелїяк присутне и у ознакох вецей жупанийох Закарпатскей (Подкарпатскей) обласци, а белаво-златна комбинация фарбох и ознака Рюриковичох, владарского дому Києвскей Руси, першей штредньовиковней держави Восточних Славянох, односно Русинох.
Нєшка тот герб представя общеприлапени знак векшини русинских орґанизацийох ширцом швета: у Словацкей, Ческей, Польскей, України, Мадярскей, Румуниї, Горватскей, Сербиї, Нємецкей, ЗАД, Канади и индзей. Вон препознатлїви знак и часц идентитета шицких Руснацох, без огляду на їх реґионалну припадносц и националну ориєнтацию.

 

 

Застава

Застава Руснацох у Сербиї то трофарбова подлога застави Републики Сербиї на хтору положени герб войводянских Руснацох. На тот способ витворена єдинствена символика — ґеоґрафска и емотивна припадносц Руснацох ґу держави Сербиї и традицийне заєднїцтво з державотворним народом, а источасно и нєспорна вязаносц за историйни край свойого походзеня.

 

 

Националне швето

За националне швето Руснацох у Републики Сербиї прилапени 17. януар. Истого датума 1751. року, Франц Йозеф де Редл, совитнїк царици Мариї Терезиї и администратор Кральовско-державного Бачкого дистрикту у Зомборе подписал перши урядови документ — Контракт о насельованю 200 руских грекокатолїцких фамелийох на тедишню пустару Вельки Керестур. Тот дзень уж вецей децениї прилапени як дзень урядового досельованя Руснацох на тоти простори.

 

Share on FacebookTweet about this on TwitterEmail this to someone